Stofa Gígju G. Thoroddsen

Gígja Guðfinna Thoroddsen, Gía, (1957-2021) bjó og starfaði í Reykjavík, hún stundaði nám hjá Hring Jóhannessyni listmálara í Myndlistarskóla Reykjavíkur 1975, Vallekille lýðháskólanum í Danmörku 1975 og sótti þriggja mánaða teikninámskeið í Árhúsum í Danmörku 1976, þá fór hún á námskeið hjá Helga Skúlasyni leikara 1977.

Gígja hélt einkasýningar og tók þátt í samsýningum. Verk hennar eru í eigu einstaklinga, Landspítalans, Krabbameinsfélagsins, Friðarseturins Höfða og Safnasafnsins þar sem meginhluti verka hennar er varðveittur. Safnið bauð henni að sýna sumarið 2016 og hlaut hún mikið lof fyrir. Eftir að hún andaðist gaf Ásta Steinunn systir hennar og fjölskylda safninu 800 verk, í kjölfarið voru málverk hennar kynnt þar og hafa flest verið skráð í Sarp.

Verk Gígju skírskota til listasögunnnar, samfélagsins og eigin reynslu, bæði í málverkum og teikningum með fjölbreyttu myndefni, meðal annars af þekktu fólki úr samtíma og mannkynssögu. Þá eru nokkur verk af heimspekilegum toga. Gígja málaði aðallega með gull- og silfurblöndum en líka bláum og rauðum tónum sem kallast fallega á við hina litina.

↓

Sýningar á vegum safnsins

2022 – Gígja Thoroddsen
2024 – Myrkraverk og bjartsýni
2024 – GÍA

↓

↓