Stofa Thors Vilhjálmssonar

Thor teiknaði og gerði myndverk alla tíð og oftar en ekki var náttúran sá hugmyndagjafi sem hann leitaði í. Myndverk Thors kallast á við kjarnyrtar náttúrulýsingar í skáldverkum hans, þar sem hann kallar fram með orðum þær náttúrumyndir sem hann hér dregur upp með penna, krít eða lit.

Nokkur einkennandi stef eru í myndsköpun Thors Vilhjálmssonar og endurtekin allt frá fyrstu tíð. Fyrst ber þar að nefna fuglinn, tákn frelsis og hugarflugs en líka erótíkur. Maður með fugl á öxl sér eða þá á hljóðskrafi við hóp spörfugla, rjúpur sem kúra í kjarri eða einmana sjófugl sem drúpir höfði í klettum. Fljótt, fljótt, sagði fuglinn. Annað algengt mótív er maður eða kona sem horfir á skip sigla við hafsbrún, yfir svífur andi trega og eftirsjár, eða þess sem ekki verður náð. Er það ástin? Óuppfyllt þrá? Draumurinn um frelsi farmannsins? Eða táknmynd þess sem er alltaf einn?  

Kvenlíkaminn er óþrjótandi uppspretta myndefnis hjá Thor, kynið, gleiðir fætur og rauður máni sem skín yfir. En fyrst og fremst leitar hann hughrifa í íslensku landslagi, með öll þessi andlit sem birtast í klettum, drangar sem kyssast, hestar og menn í ósporræku hrauni, snöggfærðar sýnir.

↓

Sýningar á vegum safnsins

2025 Aldarminning

↓